Яндан хөөлөх зааварчилгаа

Хүйтний улирал наашилж, айл өрхүүд галлагаа хийх нь ихэсдэг. Мөн үүнийгээ дагаад санамсар болгоомжгүй, мэдлэг мэдээлэлгүйн улмаас угаартан, эрүүл мэндээрээ хохирох эрсдэлд ордог. Тиймээс ард иргэдээ болзошгүй аюул, эрсдэлээс хамгаалах зорилгоор Орчны бохирдлыг бууруулах үндэсний хорооноос “Яндангаа хөөлье” аяныг улс оронд даяар өрнүүлж байна. Тэд иргэдийн аюулгүй байдлыг бодолцон яндангаа дараах зааврын дагуу хөөлөхийг зөвлөж байна.

Уламжлалт болон төслийн зуухны янданг хэрхэн хөөлөх вэ?

1. Галлахын өмнө яндангаа буулгаж үзүүр хэсэгтээ арзгар тросстой урт саваагаар хөө, тортгийг цэвэрлэнэ.
2. Цэвэрлэсний дараа яндангийн нэг үзүүрт битүү уут углаж зөөлөн түншиж хөө, тортогийг хийнэ.
3. Дээрх үйлдлийг 2-3 удаа давтана.

Ханан пийшинг хэрхэн хөөлөх вэ?

1. Байшингийн шувуу нуруунаас дээш гарсан янданг үзүүртээ арзгар тросстой 6 метр урт саваагаар дотор ханыг үрж тортог, бохийг унагана.
2. Савааг ханан пийшингийн худгийн доод хэсэгт хүргэнэ.
3. Ханан пийшин хэдэн худагтайгаас хамаарч худаг бүрт нүх гаргаж, дотор хана, булан тохой,өнцгүүдийг сайтар цэвэрлэж хөө тортгийг хутгаж авна.

Анхаарах:
1. Яндан хөөлөх явцад гэмтэл үүсч ан цав гарахаас сэргийлээрэй.
2. Хэрэв яндан элэгдэж, нимгэран ан цав гарч цоорсон тохиолдолд битүүлж шавардах эсвэл солих шаардлагатай.
3. Янданг жилд 2-3 удаа хөөлж хэвшээрэй.

Хүн бүр хариуцлагатай байж дээрх зааврыг ягштал мөрдөж өөрийгөө болон хайртай хүмүүсээ угаарын хийн хордлогоос хамгаалаарай.

Мэдээлэл авах утас: 70119400

Эх сурвалж: Орчны бохирдлыг бууруулах үндэсний хороо